Det er min dag i dag.....

Mandag hadde eg besøk av ein journalist frå lokalavisa, Jærbladet.

Der skriv dei om jubilantar som rundar heile tal.

Denne gongen hadde ho plukka ut meg,

eg vann det store lotteriet, eg som aldri har vinnarlykke.......

Eg let orda til journalisten vera dagen innlegg:

.........

50 år og på veg opp

DANSEFEST:
Ruth Bernssen Bø har leigd sitt eige danseband når ho laurdag feirer fødselsdagen sin på Røde Kors-huset på Nærbø

Ruth Bernssen Bø er komen til eit punkt i livet der ho bruker meir tid på seg sjølv.

BRIT ROMSBOTN
tekst og foto
br@jbl.no

– Eg er nok prega av «tidens tann» og eg har fått eindel smårusk her og der. Men no går det framover. Eg har nett vore på rehabilitering i Fjaler i Sogn og Fjordane, og tre dagar i veka er eg med i ei gruppe som trener med fysioterapeut i varmtvassbassenget på Nærbø. Eg stortrivest i bassenget, seier Ruth Bernssen Bø.

Tur og foto
Sola skin en siste måndagen i november. Frå bustaden i Vålansvegen på Nærbø kan ho sjå heilt til sjøen.
Ruth Bernssen Bø har alltid sett pris på natur og uteliv. Dagane startar ho ofte med ein tur. Og aller best likar jo seg ved havet.
– Eg liker å kjenna været og høyra på fuglane, og for meg er dette verdens beste treningsplass. Og så passar underlaget godt for meg, for eg skal ikkje gå på asfalt. Kor langt eg går, er avhengig av kva eg klarer. Turane kan vara frå eit kvarter til opp mot 45 minutt.
Ho har alltid med seg fotoapparatet, og ofte er fotograferinga ein stor motivasjon for å koma seg ut. Ruth Bernssen Bø tek ikkje berre bilde for seg sjølv, ho liker og å dela det ho opplever gjennom kameralinsa med andre.
– Før tok eg mykje bilde av ungane. Men når dei ikkje ville meir, måtte eg finna på noko anna. No går det mest i naturbilde. Og så er eg veldig glad i Svein Inge Årrestad sin song «Heim te Jæren». Eg opplever innhaldet i teksten når eg er ute og går, fortel jubilanten, som i samarbeid med forfattaren har laga sitt eige hefte med bilete til songteksten.
Planen var at det skulle vera julegåve til slekt og venner i fjor. – Men det spreidde seg til fleire, og eg har fått laga nærare 100 eksemplar av heftet. Eindel av dei har eg selt.

Fest med danseband
Ruth Bernssen Bø er fødd og oppvaksen på Nærbø. Ho ler når eg spør om korleis ho møtte ektemannen Ole.
– Det skjedde på ein busstur til Tyskland. Det var ein tur med venner og venners venner. Eg er ikkje heilt sikker på årstalet, men eg trur det kan ha vore i 1977-1978.
Dei tre barna, som er frå 21 til 27 år gamle, har flytta ut av heimen. Garden blir forpakta bort. No er det Ruth, ektemannen Ole og to kattar som rår grunnen.
Kattane er ikkje særleg glade for besøk, og gøymer seg når Jærbladet kjem. Men når ikkje framande er i stova, kryp dei helst oppå matmor.
Eigentleg er det to Oslo-kattar som har fått hus i Vålandsvegen.
– Dotter vår hadde dei då ho studerte i Oslo. Så det var var innekattar i hovudstaden er no blitt utekattar på Jæren. No er dotter vår i Tromsø, så kattane kunne vore nordlendingar no. Men dei har vore så lenge her hjå oss at eg trur me må kalla dei våre.
Ruth Bernssen Bø har i ei årrekke vore tilsett i Hå kommune. Ho har arbeidd i bustadar for psykisk utviklingshemma, i barnehage og innan eldreomsorgen.
Men for eit og eit halvt år sidan var det slutt som omsorgsarbeidar. No er det kjøring det handlar om.
– Eg fraktar både mat og folk. Og eg stortrivest! Eg kjører mat frå kjøkkenet ved Hå sjukeheim på Nærbø, og eg kjører eldre til dagsenter. Eg liker godt å koma meg rundt og følga med på det som skjer. For meg var det godt med ei endring.
Dagens skal feirast med fest på Røde Kors-huset. Ruth Bernssen Bø har leigd dansebandet «Terjes» til feiringa.– Kring 75 gjester er inviterte, og det kjem både naboar, venner og familie. Eg dansa mykje før, og eg ville ikkje ha ei stiv 50-års feiring, slår jubilanten fast.